മന്ത്രവാ​​​​ദിയെ തട്ടിക്കൊണ്ടുപോയ കേസിൽ രണ്ടുപേർ പിടിയിൽ

പാലക്കാട്: മന്ത്രവാദിയെ തട്ടിക്കൊണ്ടുപോയി തടവിൽ പാർപ്പിച്ച സംഭവത്തിൽ രണ്ടുപേർ അറസ്റ്റിൽ. തമിഴനാട് വെല്ലൂർ സ്വദേശി ലോകനാഥൻ, കൂടലൂർ സ്വദേശി ശിവകുമാർ എന്നിവരാണ് പിടിയിലായത്. മണ്ണാർക്കാട് വിയ്യക്കുർശ്ശി സ്വദേശിയായ മന്ത്രവാദിയെയാണ് ഇവര‍്‍ തടങ്കലിൽ പാർപ്പിച്ചത്. വിയ്യക്കുർശ്ശി കൊറ്റിയോട് കുറ്റിക്കാട്ടിൽ ഹബീബ് നടത്തിയ മന്ത്രവാദം ഫലിക്കാത്തതിനെ തുടർന്നായിരുന്നു പ്രതികൾ ഇയാളെ തട്ടിക്കൊണ്ടുപോയത്. ഹബീബിനെ കാണാനില്ലെന്ന ഭാര്യയുടെ പരാതിയിൽ നടത്തിയ അന്വേഷണത്തിനൊടുവിലാണ് മണ്ണാർക്കാട് പൊലീസ് പ്രതികളെ അറസ്റ്റ് ചെയ്തത്.

മന്ത്രവാദത്തിന്റെ പേരിൽ ഹബീബ് പ്രതികളുടെ കയ്യിൽ നിന്ന് വൻതുക കൈക്കലാക്കിയിരുന്നു. മന്ത്രവാദം ഫലിക്കാതെ വന്നതോടെ പ്രതികൾ പണം തിരികെ ആവശ്യപ്പെട്ടു. എന്നാൽ, പണം തിരികെ നൽകാൻ ഹബീബ് തയ്യാറായില്ല. ഇയാൾ പലതവണയായി ലക്ഷങ്ങൾ കൈക്കലാക്കിയെന്നാണ് പ്രതികൾ പൊലീസിനു നൽകിയ മൊഴി.

ഈ തുക പലതണ ആവശ്യപ്പെട്ടെങ്കിലും നൽകിയില്ല. തുടർന്ന് മന്ത്രവാദം ചെയ്യാനുണ്ടെന്ന് പറഞ്ഞ് ഹബീബിനെ വിളിച്ചു വരുത്തി പ്രതികളുടെ വീട്ടിൽ തടങ്കലിൽ വയ്ക്കുകയായിരുന്നുവെന്ന് പൊലീസ് പറഞ്ഞു. ജോലിയുടെ ആവശ്യത്തിനായി പാലക്കാട്ടേക്ക് പോയ ഹബീബിനെ കാണാനില്ലെന്ന ഭാര്യയുടെ പരാതിയിൽ എസ്ഐ എ.കെ.ശ്രീജിത്തും സംഘവും നടത്തിയ അന്വേഷണത്തിലാണ് പ്രതികളെ കണ്ടെത്തിയത്. പ്രതികളുടെ വീട്ടിൽ നിന്ന് ഹബീബിനെ മോചിപ്പിച്ചു. പ്രതികളെ കോടതിയിൽ ഹാജരാക്കി.