പൊതുമേഖലാ ബാങ്കുകളിൽ ബിരുദധാരികൾക്ക് അവസരം; 10277 ഒഴിവുകൾ

കേന്ദ്ര പൊതുമേഖലാ ബാങ്കുകളിൽ 2026-27 വർഷത്തേക്ക് ക്ലറിക്കൽ കേഡറിലുള്ള കസ്റ്റമർ സർവിസ് അസോസിയേറ്റ് തസ്തികയിലേക്ക് ഐ.ബി.പി.എസ് കോമൺ റിക്രൂട്ട്മെന്റിനായി അപേക്ഷകൾ ക്ഷണിച്ചു. ബാങ്ക് ഓഫ് ബറോഡ, ബാങ്ക് ഓഫ് ഇന്ത്യ, ബാങ്ക് ഓഫ് മഹാരാഷ്ട്ര, കനറാബാങ്ക്, സെൻട്രൽ ബാങ്ക് ഓഫ് ഇന്ത്യ, ഇന്ത്യൻ ബാങ്ക്, ഇന്ത്യൻ ഓവർസീസ് ബാങ്ക്, പഞ്ചാബ് നാഷനൽ ബാങ്ക്, പഞ്ചാബ് ആൻഡ് സിന്ത് ബാങ്ക്, യൂ​കോ ബാങ്ക്, യൂനിയൻ ബാങ്ക് ഓഫ് ഇന്ത്യ എന്നീ 11 ബാങ്കുകളാണ് റിക്രൂട്ട്മെന്റിൽ പ​ങ്കെടുക്കുന്നത്. ശമ്പളനിരക്ക് 24,050-64,480 രൂപ.

വിവിധ സംസ്ഥാന/​കേന്ദ്രഭരണ പ്രദേശങ്ങളിലുള്ള ബാങ്ക് ബ്രാഞ്ചുകളിലായി ആകെ 10277 ഒഴിവുകളാണ് നിലവിലുള്ളത്. റിക്രൂട്ട്മെന്റ് സംസ്ഥാനതലത്തിലായതിനാൽ ഏതെങ്കിലുമൊരു സംസ്ഥാന/കേന്ദ്രഭരണ പ്രദേശത്തിലെ ഒഴിവുകളിലേക്ക് മാത്രമേ അപേക്ഷിക്കാൻ പാടുള്ളൂ. അപേക്ഷിക്കുന്ന സംസ്ഥാനത്തിലാവും നിയമനവും.

വിശദവിവരങ്ങളടങ്ങിയ റിക്രൂട്ട്മെന്റ് വിജ്ഞാപനം www.ibps.inൽ. സംസ്ഥാനാടിസ്ഥാനത്തിൽ ഓരോ ബാങ്കിലും ലഭ്യമായ ഒഴിവുകൾ, യോഗ്യതാമാനദണ്ഡങ്ങൾ, സെലക്ഷൻ നടപടികൾ, സംവരണം, അപേക്ഷാസമർപ്പണത്തിനുള്ള നിർദേശങ്ങൾ അടക്കമുള്ള വിവരങ്ങൾ വിജ്ഞാപനത്തിലുണ്ട്.

യോഗ്യത: ഏതെങ്കിലും വിഷയത്തിൽ അംഗീകൃത സർവകലാശാലാ ബിരുദം. പ്രാദേശിക ഭാഷയിൽ വായിക്കാനും എഴുതാനും സംസാരിക്കാനും കാര്യങ്ങൾ മനസ്സിലാക്കാനുമുള്ള പ്രാവീണ്യമുണ്ടായിരിക്കണം. ഇത് പരിശോധിക്കാൻ നടത്തുന്ന പരീക്ഷയിൽ യോഗ്യത നേടണം. കമ്പ്യൂട്ടർ പരിജ്ഞാനം നിർബന്ധം. കമ്പ്യൂട്ടർ/ഐ.ടി ഹൈസ്കൂൾ/കോളജ് തലത്തിൽ ഒരു വിഷയമായി പഠിച്ചിരിക്കണം. അല്ലെങ്കിൽ കമ്പ്യൂട്ടർ ഓപറേഷൻ/ലാംഗ്വേജിൽ സർട്ടിഫിക്കറ്റ്/ഡിപ്ലോമ/ഡിഗ്രി ഉണ്ടായിരുന്നാലും മതി.