കഴക്കൂട്ടത്ത് ബൈക്ക് മോഷ്ടാക്കൾ അറസ്റ്റിൽ

കഴക്കൂട്ടം: കഴക്കൂട്ടത്ത് പട്ടാപ്പകൽ ബൈക്ക് മോഷണം നടത്തിയ പ്രതികൾ പിടിയിൽ. കൊല്ലം മൈലക്കാട് സ്വദേശികളായ ഉറിഞ്ചാൻ സുധീഷ് (24),​ഭാസി എന്ന അഖിൽ (24) എന്നിവരാണ് പിടിയിലായത്.

കഴിഞ്ഞ 7ന് ഉച്ചയ്‌ക്കാണ് കഴക്കൂട്ടം എലിവേറ്റഡ് ഹൈവേയിൽ പാർക്ക് ചെയ്തിരുന്ന കഠിനംകുളം സ്വദേശി ഷാരൂഖ് ഖാന്റെ സൂപ്പർ ബൈക്ക് മോഷണം പോയത്. പരാതിയുടെ അടിസ്ഥാനത്തിൽ പോലീസ് കേസെടുത്ത് അന്വേഷണം നടത്തി.

സി.സി ടിവികൾ കേന്ദ്രീകരിച്ച് നടത്തിയ അന്വേഷണത്തിൽ കൊല്ലം ഭാഗത്തേയ്ക്കാണ് ബൈക്ക് കൊണ്ടുപോയതെന്ന് കണ്ടെത്തി.നമ്പർ മാറ്റി ബൈക്ക് വിൽക്കാൻ ശ്രമിക്കുന്നതിനിടെയാണ് പ്രതികളെ പിടികൂടിയത്. ഇവർ വാഹന മോഷണം,​ഗുണ്ടാ ആക്രമണം തുടങ്ങി നിരവധി കേസുകളിൽ പ്രതികളാണ്. ഇവരെ റിമാൻഡ് ചെയ്തു.