എസ്എഫ്ഐ ജില്ലാ പ്രസിഡന്റിന് നേരേ അജ്ഞാതസംഘത്തിന്റെ ആക്രമണം

തിരുവനന്തപുരം: എസ്എഫ്ഐ നേതാവിന് നേരേ അജ്ഞാതസംഘത്തിന്റെ ആക്രമണം. എസ്എഫ്ഐ തിരുവനന്തപുരം ജില്ലാ പ്രസിഡന്റ് എം.എ.നന്ദനാണ് ആക്രമണത്തിനിരയായത്. പേട്ട കല്ലുംമൂട് സ്വദേശിയായ നന്ദനെ രണ്ടുപേർ ചേർന്ന് ആക്രമിക്കുകയായിരുന്നു. സ്പാനർ കൊണ്ടുള്ള അടിയിൽ നന്ദന്റെ തലയ്ക്കും നടുവിനും പരുക്കേറ്റു. നന്ദൻ ജനറൽ ആശുപത്രിയിൽ ചികിത്സ തേടി.

വെള്ളിയാഴ്ച രാത്രി 10.45ന് ആയിരുന്നു സംഭവം. കല്ലൂംമൂട്ടിലുള്ള വീട്ടിലേക്കു പോകുമ്പോൾ മാസ്ക് ധരിച്ചെത്തിയ രണ്ടുപേർ പിന്നിൽനിന്ന് ആക്രമിച്ചെന്നും അസഭ്യം പറഞ്ഞു ഭീഷണിപ്പെടുത്തിയെന്നും നന്ദൻ പറഞ്ഞു. പരാതിയിൽ പേട്ട പൊലീസ് കേസെടുത്ത് അന്വേഷണം തുടങ്ങി.

രണ്ടാഴ്ച മുൻപും നന്ദനും വീടിനും നേരെ അജ്ഞാതസംഘത്തിന്റെ ആക്രമണമുണ്ടായിരുന്നു. രണ്ടു തവണ കേസ് റജിസ്റ്റർ ചെയ്തെങ്കിലും പൊലീസിനു പ്രതികളെ കണ്ടെത്താനായിരുന്നില്ല.