1 min read

എസ്എഫ്‌ഐ അഴിഞ്ഞാടുന്നു, അക്രമത്തെ പോത്സാഹിപ്പിക്കുന്നത് മുഖ്യമന്ത്രി: വി ഡി സതീശൻ

Manju

March 1, 2024

എസ്എഫ്‌ഐ അഴിഞ്ഞാടുന്നു, അക്രമത്തെ പോത്സാഹിപ്പിക്കുന്നത് മുഖ്യമന്ത്രി: വി ഡി സതീശൻ

തിരുവനന്തപുരം: പൂക്കോട് വെറ്ററിനറി സര്‍വകലാശാല കാമ്പസിലെ വിദ്യാര്‍ഥി സിദ്ധാര്‍ഥന്‍റെ മരണത്തില്‍ എസ്എഫ്‌ഐക്കെതിരേ ആഞ്ഞടിച്ച് പ്രതിപക്ഷ നേതാവ് വി.ഡി.സതീശന്‍. എസ്എഫ്‌ഐക്കാര്‍ കാമ്പസുകളില്‍ അഴിഞ്ഞാടുകയാണെന്ന് സതീശന്‍ വിമര്‍ശിച്ചു. പ്രതികളായ എസ്എഫ്ഐക്കാരെ രക്ഷിക്കാനുള്ള ശ്രമം ഇപ്പോഴും നടക്കുന്നു. കോളജിലെ ഇടത് സംഘടന അധ്യാപകരും സംഭവത്തിൽ ഉൾപ്പെട്ടിട്ടുണ്ട്. സംസ്ഥാനത്തെ ക്രിമിനൽ സംഘങ്ങളെ അഴിഞ്ഞാടാൻ വിടുന്നത് മുഖ്യമന്ത്രിയെന്നും വി ഡി സതീശൻ വ്യക്തമാക്കി.

എസ്എഫ്‌ഐ കാമ്പസുകളില്‍ ഭീതിയുടെ അന്തരീക്ഷം സൃഷ്ടിക്കുകയാണ്. നിലവിൽ കേരളത്തിലെ കാമ്പസുകളിലേക്ക് കുട്ടികളെ അയയ്ക്കാന്‍ രക്ഷിതാക്കള്‍ക്ക് ഭയമാണെന്നും സതീശൻ പറഞ്ഞു. സിദ്ധാര്‍ഥന്‍റെ മരണത്തില്‍ സര്‍ലകലാശാലയിലെ ഡീനും പ്രതിസ്ഥാനത്ത് നില്‍ക്കുന്ന ആളാണ്. ഇത് മൂടിവയ്ക്കാന്‍ ശ്രമിച്ച ഡീനെയും മറ്റ് ചില അധ്യാപകരുടെയും പങ്ക് അന്വേഷിക്കണം. ഇവരെ സ്ഥാനത്തുനിന്ന് മാറ്റി നിര്‍ത്തിയ ശേഷം അന്വേഷണം നടത്തണമെന്നും സതീശന്‍ ആവശ്യപ്പെട്ടു.

ക്രിമിനലുകൾക്ക് അഴിഞ്ഞാടാൻ ഗവൺമെൻ്റും സിപിഐഎമ്മും പിന്തുണ നൽകുന്നു.ക്രിമിനലുകളെ ഒതുക്കിയില്ലെങ്കിൽ യുഡിഎഫും കോൺഗ്രസും ഞങ്ങളുമായി ബന്ധപ്പെട്ട് നിൽക്കുന്ന വിദ്യാർത്ഥി സംഘടനകളും സമരത്തിലേക്ക് പോകും. എസ്എഫ്‌ഐയെ അക്രമത്തിന് പ്രേരിപ്പിക്കുന്നത് മുഖ്യമന്ത്രിയാണെന്നും സതീശന്‍ വിമര്‍ശിച്ചു. നവകേരള സദസ് നടക്കുമ്പോള്‍ അഴിഞ്ഞാടിയ എസ്എഫ്‌ഐ, ഡിവൈഎഫ്‌ഐ പ്രവര്‍ത്തകരെ രക്ഷാപ്രവര്‍ത്തകരെന്ന് വിളിച്ച് ന്യായീകരിച്ച ആളാണ് മുഖ്യമന്ത്രി. എസ്എഫ്‌ഐ ക്രിമിനലുകളെ നിയന്ത്രിച്ചില്ലെങ്കില്‍ യുഡിഎഫും കോണ്‍ഗ്രസും അതിശക്തമായ സമരത്തിലേക്ക് നീങ്ങുമെന്നും സതീശന്‍ കൂട്ടിച്ചേര്‍ത്തു.