ഷട്ടർ തകർത്തു കവർച്ച; മോഷ്ടിച്ചത് 50 പവൻ സ്വർണ്ണം

കോഴിക്കോട്: താമരശ്ശേരിയിൽ ജ്വല്ലറിയുടെ ചുമര് തുരന്ന് കവർച്ച നടത്തി . ഡിവൈഎസ്പി ഓഫീസിന് സമീപത്തെ റന ഗോൾഡ് ജ്വല്ലറിയിലാണ് കവർച്ച നടന്നത്. 50 പവൻ സ്വര്‍ണം നഷ്ടപ്പെട്ടതായിയാണ് പ്രാഥമിക വിവരം. കൊടുവള്ളി ആവിലോറ സ്വദേശി അബ്ദുൽ സലാമിന്‍റെ ഉടമസ്ഥതയിലുള്ളതാണ് സ്ഥാപനം. ഇന്ന് രാവിലെ കട തുറന്നപ്പോഴാണ് മോഷണ വിവരം അറിഞ്ഞത്. മുകളിലെ മുറികളിലേക്ക് കയറുന്ന ഗോവണിയുടെ സമീപമുള്ള ഷട്ടർ തകർത്ത് അകത്തു കടന്ന ശേഷം ജ്വല്ലറിയുടെ ചുമര് തുരന്ന് കവർച്ച നടത്തുകയായിരുന്നുവെന്നാണ് പൊലീസ് പറയുന്നത്. സംഭവത്തിൽ താമരശ്ശേരി പൊലീസ് കേസെടുത്തിട്ടുണ്ട്. സമീപത്തെ സിസിടിവികൾ പരിശോധിച്ച് അന്വേഷണം ആരംഭിച്ചു.