മധ്യപ്രദേശില്‍ കുഴല്‍ക്കിണറില്‍ വീണ പത്തു വയസുകാരന്‍ മരിച്ചു

മധ്യപ്രദേശ് : മധ്യപ്രദേശ് ഗുണയില്‍ കുഴല്‍ക്കിണറില്‍ വീണ പത്തുവയസുകാരന്‍ മരണപെട്ടു. കുട്ടിയെ പുറത്തെടുത്ത് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. 16 മണിക്കൂര്‍ നീണ്ട ദൗത്യത്തിന് ഒടുവില്‍ ആണ് കുട്ടിയെ പുറത്തെടുത്തത്. ഇന്നലെ വൈകിട്ടാണ് കുട്ടി കുഴല്‍ കിണറിനകത്തേക്ക് വീണത്.

ഗുണ ജില്ലയിലെ പിപ്ലിയ ഗ്രാമത്തില്‍ ഇന്നലെ വൈകിട്ട് 5 മണിയോടെയാണ് പത്ത് വയസുക്കാരന്‍ സുമിത് മീണ പട്ടം പറത്തുന്നതിനിടയില്‍ കുഴല്‍ക്കിണറില്‍ വീണത്. 140 അടി താഴ്ചയുള്ള കുഴല്‍ക്കിണറില്‍ 39 അടി താഴ്ചയിലാണ് കുട്ടി കുടുങ്ങിയത്. എന്‍ഡിആര്‍എഫിന്റെ നേതൃത്വത്തിലായിരുന്നു രക്ഷാപ്രവര്‍ത്തന ദൗത്യം നടത്തിയത്.

16 മണിക്കൂര്‍ നീണ്ട രക്ഷാദൗത്യത്തിന് ഒടുവില്‍ ഇന്ന് രാവിലെ 9 മണിയോടെ കുട്ടിയെ പുറത്ത് എടുത്തത്. കുഴല്‍ കിണറില്‍ നിന്നും പുറത്തെടുത്ത കുട്ടി രഘോഗഡിലെ ആശുപത്രിയില്‍ എത്തിച്ചെങ്കിലും ഡോക്ടര്‍മാര്‍ മരണം സ്ഥിരീകരിക്കുകയായിരുന്നു.