ഓപ്പണിങ്ങിൽ വീണ്ടും വെടിക്കെട്ടുമായി സഞ്ജു; സയ്യിദ് മുഷ്താഖ് അലി ടി20 ടൂര്‍ണമെന്റിൽ കേരളത്തിന് കിടിലൻ തുടക്കം

ഹൈദരാബാദ്: ദക്ഷിണാഫ്രിക്കന്‍ പരമ്പരയിൽ പുറത്തെടുത്ത വെടിക്കെട്ട് പ്രകടനം സയ്യിദ് മുഷ്താഖ് അലി ടി20 ടൂര്‍ണമെന്റിലും തുടര്‍ന്ന് ക്യാപ്റ്റന്‍ സഞ്ജു സാംസൻ. സഞ്ജുവിന്റെ മികവില്‍ കേരളത്തിന് വിജയത്തുടക്കം. സര്‍വീസസിനെ മൂന്നു വിക്കറ്റിനാണ് കേരളം പരാജയപ്പെടുത്തിയത്. സര്‍വീസസ് ഉയര്‍ത്തിയ 150 റണ്‍സ് വിജയലക്ഷ്യം 18.1 ഓവറില്‍ ഏഴു വിക്കറ്റ് നഷ്ടത്തില്‍ കേരളം മറികടന്നു.

45 പന്തില്‍ നിന്ന് മൂന്ന് സിക്‌സും 10 ഫോറുമടക്കം 75 റണ്‍സെടുത്ത സഞ്ജുവിന്റെ വെടിക്കെട്ടാണ് കേരളത്തെ കാത്തത്. രോഹന്‍ കുന്നുമ്മലിനും (27), സല്‍മാന്‍ നിസാറിനും (21) മാത്രമാണ് പിന്നീട് കേരള നിരയില്‍ ഭേദപ്പെട്ട പ്രകടനം പുറത്തെടുക്കാനായത്.

നേരത്തേ 30 റണ്‍സിന് അഞ്ചു വിക്കറ്റ് വീഴ്ത്തിയ അഖില്‍ സ്‌കറിയയുടെ മികവില്‍ സര്‍വീസസിനെ കേരളം 149 റണ്‍സില്‍ ഒതുക്കിയിരുന്നു. ജലജ് സക്‌സേനയ്ക്ക് ശേഷം ടൂര്‍ണമെന്റില്‍ അഞ്ചു വിക്കറ്റ് നേട്ടം സ്വന്തമാക്കുന്ന ആദ്യ കേരള ബൗളറാണ് അഖില്‍. നിധീഷ് രണ്ടും വിനോദ് കുമാര്‍, സിജോമോന്‍ ജോസഫ് എന്നിവര്‍ ഓരോ വിക്കറ്റ് വീതവും വീഴ്ത്തി. അഖിലാണ് കളിയിലെ താരം.

29 പന്തില്‍ നിന്ന് 41 റണ്‍സെടുത്ത ക്യാപ്റ്റന്‍ മോഹിത് അലാവത്താണ് സര്‍വീസസിന്റെ ടോപ് സ്‌കോറര്‍. വിനീത് ധന്‍കാര്‍ (35), അരുണ്‍ കുമാര്‍ (28) എന്നിവരും ഭേദപ്പെട്ട പ്രകടനം നടത്തി. ടോസ് നേടിയ കേരളം ഫീല്‍ഡിങ് തെരെഞ്ഞെടുക്കുകയായിരുന്നു.