ചാവക്കാട്, കടലിൽ കുളിക്കുന്നതിനിടെ അപസ്മാരം; പ്ലസ്ടു വിദ്യാർത്ഥി കുഴഞ്ഞു വീണു

തൃശൂര്‍: ചാവക്കാട് കടലിൽ കുളിക്കുന്നതിനിടെ പ്ലസ് ടു വിദ്യാർത്ഥി കുഴഞ്ഞു വീണു. അപസ്മാരമുണ്ടായതിനെ തുടർന്നാണ് വിദ്യാർത്ഥി കുഴഞ്ഞുവീണത്. ഉടൻതന്നെ കൂട്ടുകാർ കരയ്ക്കെത്തിച്ച് സിപിആർ നൽകിയത് രക്ഷയായി. ഇന്ന് ഉച്ചയ്ക്കാണ് സംഭവം നടന്നത്. കോയമ്പത്തൂർ ഭാരതി ഹയർസെക്കന്‍ഡറി സ്കൂളിലെ പ്ലസ്‌ടു വിദ്യാർത്ഥി വി.എസ് ഗോകുലും കൂട്ടുകാരും ചാവക്കാട് കടലിൽ കുളിക്കുന്നതിനിടെ ​ഗോകുലിന് അപസ്മാരമുണ്ടാകുകയായിരുന്നു.

കടലിൽ കുഴഞ്ഞുവീണ ഗോകുൽ അബോധാവസ്ഥയിലായി. സ്ഥലത്തുണ്ടായിരുന്ന സഹപാഠികളായ വിദ്യാർത്ഥികൾ ഗോകുലിനെ കരയ്ക്ക് എത്തിച്ച് സിപിആർ നൽകി. പിന്നീട് ചാവക്കാട് ഹയാത്ത് ആശുപത്രിയിൽ എത്തിച്ചു ചികിത്സ നൽകി വിട്ടയക്കുകയായിരുന്നു. ഗോകുലിനെ സുഹൃത്തുക്കള്‍ ഉടനെ തന്നെ കരയ്ക്ക് എത്തിച്ച് സിപിആര്‍ നൽകിയതാനാലാണ് വലിയ അപകടം ഒഴിവായത്.