തെരുവു നായ സ്കൂട്ടറിനു കുറുകെ ചാടി; അപകടത്തിൽപ്പെട്ട് ആശുപത്രിയിലായിരുന്ന യുവതി മരിച്ചു

കൊല്ലം: തെരുവു നായ ബൈക്കിന് കുറുകെ ചാടിയുണ്ടായ അപകടത്തിൽ ചികിത്സയിലായിരുന്ന യുവതി മരിച്ചു. 42 കാരിയായ വിനീതയാണ് മരിച്ചത്. വിനീതയും ഭര്‍ത്താവ് ജയകുമാറും സ്കൂട്ടറിൽ ജോലിക്ക് പോകുന്നതിനിടെ തെരുവു നായ കുറുകെ ചാടുകയായിരുന്നു. ഇതോടെ സ്കൂ‍ട്ടർ നിയന്ത്രണം വിട്ട് മറിയുകയും തൊട്ടുപിന്നാലെ വന്ന ടിപ്പര്‍ ലോറി വിനീതയുടെ ശരീരത്തിലൂടെ കയറിയിറങ്ങുകയായിരുന്നു.

വെള്ളിയാഴ്ച രാവിലെ കൊച്ചുപാരിപ്പള്ളിയ്‌ക്ക് സമീപം പൊലീസ് മുക്കില്‍ വെച്ചാണ് അപകടമുണ്ടായത്. തിരുവനന്തപുരത്തേയ്‌ക്ക് ജോലിക്ക് പോകുകയായിരുന്നു ഇരുവരും. ഗുരുതരമായി പരിക്കേറ്റ വിനീതയെ തിരുവനന്തപുരത്തെ സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും ശനിയാഴ്ച രാവിലെയോടെ മരണപ്പെടുകയായിരുന്നു.