നിയാസിന്റെ സുവര്‍ണനേട്ടം കാഴ്ച്ചപരിമിതിയെ മറികടന്ന്

എറണാകുളം : സംസ്ഥാനസ്‌കൂള്‍ കായികമേളയില്‍ സബ് ജൂനിയര്‍ ആണ്‍കുട്ടികളുടെ 100 മീറ്ററില്‍ നിയാസ് അഹമ്മദ് ഒന്നാം സ്ഥാനം നേടിയപ്പോള്‍ കാണികളുടെ മുഴുവന്‍ ശ്രദ്ധ അവന്റെ കട്ടിക്കണ്ണടയിലേയ്ക്കായിരുന്നു.

ചെറുപ്പം മുതലേയുള്ള കാഴ്ച്ചപരിമിതിയെ മറികടന്ന് 12.40 സെക്കന്‍ഡില്‍ ഓടിയെത്തിയാണ് നിയാസ് മിന്നും പ്രകടനം കാഴ്ചവെച്ചത്.കാസര്‍കോട്ടെ അങ്കടിമുകര്‍ ജി.എച്ച്.എസ്.എസിലെ ഒന്‍പതാം ക്ലാസ് വിദ്യാര്‍ഥിയായ നിയാസ് പ്രത്യേക പരിശീലകരോ പരിശീലന സൗകര്യമോ ഇല്ലാതെയാണ് ഒന്നാം സ്ഥാനത്തേയ്ക്ക് പറന്നെത്തിയത്.

ആകെ രണ്ടു ദിവസമാണ് ഇതിനു മുന്‍പ് സിന്തറ്റിക്ക് ട്രാക്കില്‍ ഓടി പരിശീലിച്ചിട്ടുള്ളത്. സബ് ജില്ലയില്‍ ഒന്നാം സ്ഥാനം നേടിക്കഴിഞ്ഞാണ് ആദ്യമായി ബൂട്ട് വാങ്ങിച്ചതും. നീലേശ്വരത്ത് കട നടത്തുന്ന അഹമ്മദിന്റെയും നസീമയുടെയും മകനാണ്.