ഓടിക്കൊണ്ടിരുന്ന കാറിന് തീപിടിച്ചു

കൊല്ലം : മരുത്തടി കളരി അമ്പലത്തിനു സമീപം ഓടിക്കൊണ്ടിരുന്ന കാർ കത്തി. കാർ ഓടിച്ചിരുന്ന മരുത്തടി സ്വദേശി പ്രദീപ്കുമാർ രക്ഷപെട്ടു. തീപിടുത്തത്തിൽ കാർ പൂർണമായും കത്തിയമർന്നു. നാട്ടുകാർ അറിയിച്ചതിനെ തുടർന്ന് അഗ്നിരക്ഷാസേന എത്തിയാണ് തീകെടുത്തിയത്.

മരുത്തടിക്കു സമീപം കട നടത്തുന്നയാളാണ് പ്രദീപ്. ഭാര്യയെ വീട്ടിലാക്കിയശേഷം കാർ ഓടിച്ചുവരവേയാണ് ബോണറ്റിൽ നിന്ന്‌ പുക ഉയരുന്നതു കണ്ടത്. തുടർന്ന്‌ ഇയാൾ കാർ നിർത്താൻ ശ്രമിച്ചെങ്കിലും ബ്രേക്ക് പ്രവർത്തിച്ചില്ല. ഒടുവിൽ വളരെ പണിപ്പെട്ട് ഹാൻഡ് ബ്രേക്ക് ഉപയോഗിച്ചാണ് കാർ നിർത്തിയത്.

കത്തുന്ന കാറിൽനിന്ന് ഇദ്ദേഹത്തിന് ഇറങ്ങാൻ കഴിയുന്നില്ലെന്നു കണ്ടെങ്കിലും തീയാളുന്നതു കാരണം നാട്ടുകാർക്ക് അടുക്കാൻ കഴിഞ്ഞില്ല. ഇദ്ദേഹം പുറത്തിറങ്ങിയശേഷമാണ് വണ്ടിയുടെ എൻജിന്റെ പ്രവർത്തനം നിർത്തിയത്.