കൊല്ലത്ത് ട്യൂഷൻ കഴിഞ്ഞുപോയ വിദ്യാർത്ഥിനികളെ ഓട്ടോയിൽ കടത്തിക്കൊണ്ടുപോകാൻ ശ്രമം; രക്ഷപെട്ട് പെൺകുട്ടികൾ

കൊല്ലം: .കൊല്ലം എസ്.എൻ. കോളേജിന് സമീപത്ത് ഉച്ചയ്ക്ക് രണ്ടരയ്ക്ക് ട്യൂഷൻ കഴിഞ്ഞ് ഓട്ടോയിൽ കയറിയപ്പോഴാണ് സംഭവം. വിമല ഹൃദയ ഹയർ സെക്കൻഡറി സ്‌കൂളിലെ പ്ലസ് ടു വിദ്യാർത്ഥിനികളെ തട്ടിക്കൊണ്ടുപോകാൻ ശ്രമിച്ചെന്നാണ് പരാതി. കുട്ടികൾ ബഹളമിട്ടപ്പോൾ ഓട്ടോറിക്ഷയിൽ നിന്നും പെൺകുട്ടികൾ ചാടി രക്ഷപ്പെടുകയായിരുന്നു. കൊല്ലം ഈസ്റ്റ് പോലീസ് സ്റ്റേഷനിലേക്ക് പരിക്കേറ്റ രണ്ട് പെൺകുട്ടികൾ ഓടിക്കയറി വരുകയായിരുന്നു.ഇടവഴിയിലേക്ക് ഓട്ടോ കയറ്റിക്കൊണ്ട് പോകാൻ ശ്രമിച്ചപ്പോൾ മെയിൻ റോഡിലൂടെ പോയാൽ മതിയെന്ന് ആവശ്യപ്പെട്ടതോടെയാണ് മോശമായി സംസാരിക്കാൻ തുടങ്ങിയതെന്ന് വിദ്യാർത്ഥിനി പറയുന്നു.മോശമായി സംസാരിച്ചതോടെ ഭയമായെന്നും പിന്നാലെ വണ്ടിയുടെ വേഗത കൂട്ടിയെന്നും വിദ്യാർത്ഥിനി മാധ്യമങ്ങളോട് പറഞ്ഞു. വേഗം കൂട്ടിയതോടെ കൂടെയുണ്ടായിരുന്ന കുട്ടിയോട് വണ്ടിയിൽ നിന്ന് ചാടാമെന്ന് പറയുകയായിരുന്നു.വാഹനത്തിൽനിന്ന് ചാടി രക്ഷപ്പെട്ട് പോലീസ്സ്റ്റേഷനിലെത്തി പെൺകുട്ടികൾ വിവരം പറഞ്ഞു . സംഭവത്തിൽ കൊല്ലം ഈസ്റ്റ് പോലീസ് അന്വേഷണമാരംഭിച്ചു.