കഥകളി വേദിയില്‍ നിന്ന് ട്രാക്കിലേക്ക് ; ഓട്ടം മാത്രമല്ല ആട്ടവും വഴങ്ങും ശ്രേയക്കുട്ടിക്ക്

ഇടുക്കി : സംസ്ഥാനസ്‌കൂള്‍ കായികമേളയില്‍ ജൂനിയര്‍ പെണ്‍കുട്ടികളുടെ 100 മീറ്ററില്‍ സ്വര്‍ണം നേടിയ ആര്‍. ശ്രേയ ഓട്ടക്കാരി മാത്രമല്ല, നല്ലൊരു കഥകളി കലാകാരി കൂടിയാണ്. 12.54 സെക്കന്‍ഡ് എന്ന തന്റെ മികച്ച സമയം കൂടി കണ്ടെത്തിയാണ് ശ്രേയ അതിവേഗ ട്രാക്കില്‍ ഒന്നാമതെത്തിയത്. ആലപ്പുഴ സെന്റ്. ജോസഫ് ജി.എച്ച്.എസ്.എസിലെ പത്താം ക്ലാസ് വിദ്യാര്‍ത്ഥിനിയാണ് ഈ മിടുക്കി.

നാലാം വര്‍ഷമാണ് സംസ്ഥാന കായികമേളയില്‍ പങ്കെടുക്കുന്നതെങ്കിലും ആദ്യമായിട്ടാണ് സുവര്‍ണനേട്ടം.കഴിഞ്ഞയാഴ്ച കളര്‍കോട് മഹാദേവ ക്ഷേത്രത്തില്‍ നടന്ന ദുര്യോധനവധം കഥകളിയില്‍ കൃഷ്ണവേഷം കെട്ടിയാടിയ ശേഷമാണ് ശ്രേയ സംസ്ഥാന കായികമേളയ്‌ക്കെത്തിയത്. ആലപ്പുഴ ലിയോ അക്കാദമിയിലെ ജോസഫ് ആന്റണിയാണ് ശ്രേയയുടെ കായികപരിശീലകന്‍.