ജനവാസമേഖലയിലിറങ്ങിയ കാട്ടുപന്നികളെ വെടിവെച്ചുകൊന്നു

തെന്മല : അച്ചൻകോവിലിൽ ജനവാസമേഖലയിലിറങ്ങിയ കാട്ടുപന്നികളെ വെടിവെച്ചുകൊന്നു.
75 കാട്ടുപന്നികളെയാണ് ഗ്രാമപ്പഞ്ചായത്തിന്റെ നേതൃത്വത്തിൽ വെടിവെച്ചുകൊന്നത്.

അച്ചൻകോവിൽ മൂന്നുമുക്ക് ഉൾപ്പെടെ വിവിധ പ്രദേശങ്ങളിൽ മൂന്നു സംഘങ്ങളായി തിരിഞ്ഞുള്ള ശ്രമത്തിലാണ് ഇത്രയധികം പന്നികളെ കൊന്നത്.ചൊവ്വാഴ്ച വൈകീട്ടോടെ ആരംഭിച്ച ജോലികൾ ബുധനാഴ്ച ഉച്ചയോടെ അവസാനിപ്പിച്ചു. പന്നിയുടെ കുഞ്ഞുങ്ങളെ ഒഴിവാക്കിയാണ് വെടിവെച്ചുകൊന്നത്.

തിരുവനന്തപുരം വർക്കല സ്വദേശികളായ അനിൽകുമാർ, വിമൽകുമാർ, ജവഹർലാൽ എന്നീ ഷൂട്ടർമാരുടെ നേതൃത്വത്തിലാണ് പന്നികളെ കൊന്നൊടുക്കിയത്. വെടിയേറ്റ പന്നികളെ കണ്ടെടുക്കുകയും വാഹനത്തിൽ കൊണ്ടുവന്നു മറവുചെയ്യുകയുമായിരുന്നു.

തൊഴിലുറപ്പ് ജോലിക്കാരുടെ നേതൃത്വത്തിൽ പന്നികളെ മറവുചെയ്യാൻ വലിയ കുഴികളെടുത്തിരുന്നു. ഇത് മൂന്നാംതവണയാണ് ഗ്രാമപ്പഞ്ചായത്തിന്റെ നേതൃത്വത്തിൽ അച്ചൻകോവിൽ ഒന്നും രണ്ടും വാർഡുകളിൽ കാട്ടുപന്നികളെ വെടിവെച്ചുകൊല്ലുന്നത്. വനത്തിനു നടുവിലായുള്ള വാർഡിൽ കാട്ടുപന്നിശല്യം രൂക്ഷമാണ്. ഇവ ജനങ്ങളെയും വളർത്തുമൃഗങ്ങളെയും ആക്രമിക്കുന്നത് പതിവാണ്.