ഹോൺ മുഴക്കിയതിനെ ചൊല്ലിയുള്ള തർക്കം; മധ്യവയസ്കനെ നാലുപേർ ചേർന്ന് മർദ്ദിച്ചു

തിരുവനന്തപുരം: ദേശീയപാത ഉദിയൻകുളങ്ങരയിൽ മധ്യവയസ്കനെ നാലുപേർ ചേർന്ന് മർദ്ദിച്ചു. ഹോൺ മുഴക്കിയതിനെ ചൊല്ലിയുള്ള തർക്കമാണ് മർദ്ദനത്തിൽ കലാശിച്ചത്. നാലാംഗ സംഘം ചെങ്കൽ സ്വദേശിയായ പ്രഭു കുമാറിനെയാണ് മർദ്ദിച്ചു അവശനാക്കിയത്. ബാലരാമപുരം, നെല്ലിവിള സ്വദേശികളായ സച്ചിൻ ( 25 ), അഖിൽ (22), ബാലരാമപുരം തേരി വിള, വീട്ടിൽ വിജിത്ത് (24 ) ഉച്ചക്കട രേവതി നിവാസിൽ ശ്യാം ലാൽ (22) എന്നിവരെയാണ് പാറശ്ശാല പോലീസ് പിടികൂടിയത്.

കഴിഞ്ഞ ചൊവ്വാഴ്ച രാത്രി മദ്യലഹരിയിൽ ബൈക്കിലെത്തിയ നാലംഗ സംഘം ഉദിയൻകുളങ്ങര ജംഗ്ഷന് സമീപം റോഡിൽ അദ്യാസ പ്രകടനം നടത്തുകയായിരുന്നു. അതുവഴി ബൈക്കിലെത്തിയ പ്രഭുകുമാർ മുന്നിലേക്ക് കടക്കാൻ സാധിക്കാതെ വന്നതോടെ ബൈക്കിന്റെ ഹോൺ മുഴക്കിയത് യുവാക്കളെ പ്രകോപിപ്പിച്ചു. തുടർന്ന് നാലംഗ സംഘം പ്രഭുകുമാറുമായി വാക്കേറ്റത്തിൽ ഏർപ്പെടുകയും വളഞ്ഞിട്ട് മർദ്ദിക്കുകയായിരുന്നു. നാട്ടുകാർ എത്തിയതോടെ നാലാംഗ സംഘം ബൈക്കുമായി രക്ഷപ്പെടുകയായിരുന്നു.

പ്രഭു കുമാർ പാറശ്ശാല പോലീസിൽ പരാതി നൽകി. പാറശ്ശാല എസ്എച്ചഒ സജികുമാറിന്റെ നേതൃത്യത്തിൽ നാലംഗ സംഘത്തെ പിടികൂടി കോടതിയിൽ ഹാജരാക്കി റിമാൻഡ് ചെയ്തു.