കലാപം: കാലിഫോര്‍ണിയയിലേക്ക് നാവിക സേനയെ വിന്യസിക്കാന്‍ പെന്റഗണ്‍

അനധികൃത കുടിയേറ്റക്കാരെ അറസ്റ്റ് ചെയ്തതിനെത്തുടര്‍ന്ന് ലോസ് ഏഞ്ചല്‍സില്‍ ഉണ്ടായ കലാപങ്ങള്‍ ശമിപ്പിക്കാന്‍ പെന്റഗണ്‍ സജീവ നാവികരെ വിന്യസിക്കുമെന്ന് റിപ്പോര്‍ട്ട്. ഒന്നാം മറൈന്‍ ഡിവിഷനില്‍ നിന്നുള്ള ഏകദേശം 700 മറൈനുകള്‍ ‘ഗ്രേറ്റര്‍ ലോസ് ഏഞ്ചല്‍സ് മേഖലയിലെ ഫെഡറല്‍ ഉദ്യോഗസ്ഥരെയും ഫെഡറല്‍ സ്വത്തുക്കളെയും’ സംരക്ഷിക്കുന്നതില്‍ സഹായിക്കുമെന്ന് അമേരിക്കന്‍ നോര്‍ത്തേണ്‍ കമാന്‍ഡ് പറഞ്ഞു. നാഷണല്‍ ഗാര്‍ഡ് സൈനികരെ മറൈന്‍ സൈനികര്‍ പിന്തുണയ്ക്കുമെന്ന് റോയിട്ടേഴ്സ് റിപ്പോര്‍ട്ട് ചെയ്യുന്നു.

ഫെഡറല്‍ നിയമ നിര്‍വ്വഹണ ഉദ്യോഗസ്ഥരെ സംരക്ഷിക്കാന്‍ തങ്ങള്‍ക്ക് ബാധ്യതയുണ്ടെന്ന് പ്രതിരോധ സെക്രട്ടറി പീറ്റ് ഹെഗ്‌സെത്ത് എക്സില്‍ എഴുതി. ഇമിഗ്രേഷന്‍ ഏജന്റുമാരെയും പോലീസിനെയും സഹായിക്കാന്‍ ‘കൂടുതല്‍’ 2,000 നാഷണല്‍ ഗാര്‍ഡ് അംഗങ്ങളെ വിളിക്കുമെന്ന് പെന്റഗണ്‍ പ്രഖ്യാപിക്കുകയും ചെയ്തു.

പ്രതിഷേധക്കാര്‍ക്കെതിരെ മറൈന്‍ സേനയെ അയയ്ക്കാനുള്ള അമേരിക്കന്‍ പ്രസിഡന്റ് ഡോണള്‍ഡ് ട്രംപിന്റെ തീരുമാനത്തെ ‘അമേരിക്കന്‍ വിരുദ്ധം’ എന്ന് കാലിഫോര്‍ണിയ ഗവര്‍ണര്‍ ഗാവിന്‍ ന്യൂസം വിമര്‍ശിച്ചു.

ഹോം ഡിപ്പോയിലെ പാര്‍ക്കിംഗ് സ്ഥലത്തും ആംബിയന്‍സ് അപ്പാരല്‍ വസ്ത്ര നിര്‍മ്മാതാക്കളിലും ‘വ്യാജ ജീവനക്കാരുടെ രേഖകള്‍’ ഉപയോഗിച്ചുവെന്ന സംശയത്തിന്റെ പേരില്‍ 40-ലധികം പേരെ ഇമിഗ്രേഷന്‍ അധികൃതര്‍ അറസ്റ്റ് ചെയ്തതിനെത്തുടര്‍ന്നാണ് ലോസ് ഏഞ്ചല്‍സില്‍ പ്രതിഷേധം പൊട്ടിപ്പുറപ്പെട്ടത്. ട്രംപിന്റെ കടുത്ത കുടിയേറ്റ നയത്തെ അപലപിച്ചുള്ള പ്രകടനങ്ങള്‍ പെട്ടെന്ന് കൊള്ളയിലേക്കും പോലീസുമായുള്ള അക്രമാസക്തമായ ഏറ്റുമുട്ടലുകളിലേക്കും എത്തി. കലാപകാരികള്‍ വാഹനങ്ങള്‍ കത്തിക്കുകയും വ്യാപാര സ്ഥാപനങ്ങളില്‍ അതിക്രമിച്ചു കയറുകയും ചെയ്തു. ജനക്കൂട്ടത്തെ പിരിച്ചുവിടാന്‍ പോലീസ് കുരുമുളക് പന്തുകളും റബ്ബര്‍ ബുള്ളറ്റുകളും പ്രയോഗിച്ചു. വാരാന്ത്യത്തില്‍ കുറഞ്ഞത് 56 പേരെ അറസ്റ്റ് ചെയ്തതായി വാര്‍ത്താ ഏജന്‍സികള്‍ റിപ്പോര്‍ട്ട് ചെയ്തു.