എക്സ് ഫാക്ടർ: ട്രംപ്-മസ്‌ക് തർക്കത്തെ നർമ്മത്തിൽ ചിത്രീകരിച്ച് അമുൽ

അമേരിക്കൻ പ്രസിഡന്റ് ഡോണൾഡ് ട്രംപും ശതകോടീശ്വരൻ ഇലോൺ മസ്‌കും തമ്മിൽ അടുത്തിടെയുണ്ടായ വാഗ്വാദം ലോകമെമ്പാടുമുള്ള ചർച്ചാ വിഷയമാണ്. ഈ “കലഹ”ത്തെക്കുറിച്ച് സോഷ്യൽ മീഡിയയിൽ അഭിപ്രായങ്ങളും മീമുകളും നിറയുന്നതിനിടെ, പ്രമുഖ ഇന്ത്യൻ പാലുൽപ്പന്ന ബ്രാൻഡായ അമുൽ തങ്ങളുടെ തനത് ശൈലിയിൽ ഈ വിഷയത്തെ ചിത്രീകരിച്ച് രംഗത്തെത്തി.

വൈറ്റ് ഹൗസിലെ ഓവൽ ഓഫീസിലിരുന്ന് ഗൗരവഭാവത്തിൽ ട്രംപും, കൈകൾ കെട്ടി അരികിൽ മസ്‌കും നിൽക്കുന്നതാണ് അമുലിന്റെ ഏറ്റവും പുതിയ പരസ്യം. പതിവുപോലെ, വാക്കുകളിലൂടെ നർമ്മം കലർത്തി What goes up must come Musk down എന്ന തലക്കെട്ടാണ് അമുൽ നൽകിയിരിക്കുന്നത്. കൂടാതെ, “അമുൽ. ദി എക്സ് ഫാക്ടർ” (Amul. The X Factor) എന്ന അടിക്കുറിപ്പും ശ്രദ്ധേയമാണ്. ഇത് ഇലോൺ മസ്‌കിന്റെ ഉടമസ്ഥതയിലുള്ള X (മുമ്പ് ട്വിറ്റർ), SpaceX തുടങ്ങിയ സംരംഭങ്ങളെയും, ട്രംപുമായുള്ള അദ്ദേഹത്തിന്റെ അഭിപ്രായ വ്യത്യാസങ്ങളെയും സൂചിപ്പിക്കുന്നു. ഈ ചിത്രീകരണത്തിന്റെ അടിക്കുറിപ്പായി “Amul Topical: President of USA and billionaire/Tesla owner have a feud! എന്നും നൽകിയിട്ടുണ്ട്.

ട്രംപ്-മസ്‌ക് കൂട്ടുകെട്ട്: അമുലിന്റെ മുൻ ചിത്രീകരണം

ഇതിനുമുൻപും ട്രംപിനെയും മസ്‌കിനെയും ഉൾപ്പെടുത്തി അമുൽ ഒരു ചിത്രീകരണം പുറത്തിറക്കിയിട്ടുണ്ട്. പ്രസിഡന്റ് തിരഞ്ഞെടുപ്പിൽ ട്രംപ് വിജയിക്കുകയും, പുതുതായി രൂപീകരിച്ച സർക്കാർ കാര്യക്ഷമതാ വകുപ്പിനെ മസ്‌കും വിവേക് ​​രാമസ്വാമിയും നയിക്കുമെന്ന് പ്രഖ്യാപിക്കുകയും ചെയ്തതിന് തൊട്ടുപിന്നാലെയായിരുന്നു ഇത്.